Policia ka arrestuar vëllanë e madh të 19-vjeçares Hygerta, e cila dyshohet se ka vrarë babanë me armë zjarri.
50-vjeçari Pëllumb Meta u vra dhe u gropos në oborrin e shtëpisë në fshatin Shënavlash të Durrësit. Vajza e tij Hygerta Meta 19 vjeçe ka dëshmuar para uniformave blu se ajo është autorja e këtij krimi të rëndë, teksa u shpreh se shkak ka qenë se babai ka dashur të fejoj dhe martoj me një emigrant që jetonte në Itali, ndërsa e reja donte që të vijonte Universitetin.
Ngjarja është e mbuluar me mister, pasi është e dyshimtë se si një vajzë 19-vjeçare vrau, lidhi dhe groposi e vetme në oborrin e shtëpisë babain, ndërsa anëtarët e tjerë të familjes nuk dinin asgjë.
Policia për media ka thënë se për këtë ngjarje është e dyshuar e gjithë familja edhe pse vajza ka thënë se e ka kryer e vetme krimin. 19-vjeçarja nuk ka shprehur pendesë për ngjarjen, teksa ka thënë se është e lumtur pasi babai u kishte nxirë jetën si familje.
“Jam e lumtur që e kreva unë këtë punë dhe nuk pendohem që kam vrarë tim atë. Ai na ka torturuar dhe i ka nxirë jetën nënës sime. Unë jam fëmija i vogël i familjes. Motra është më e madhja është e martuar, janë 2 vëllezërit dhe pastaj unë. Mami dhe ne nuk kemi folur kurrë në familje. Për gjithçka fliste dhe vendoste babai“, ka thënë Hygerta.
