“Jam gati të kandidoj përballë Bashës dhe kujtdo tjetër”. Kështu u shpreh kandidati i vetëshpallur për postin e kryetarit të Partisë Demokratike, Fatbardh Kadilli, pak minuta para mbledhjes së kryesisë së Partisë Demokratike. Në hyrje, në selinë e PD-së, Kadilli u shpreh se dhe sot do të kërkojë dorëheqjen e Bashës pasi sipas tij nuk është më një zgjidhje për PD-në. “Jam sot për t’i kërkuar dorëheqjen e parevokueshme Lulzim Bashës sepse nuk është zgjidhje për PD-në, se është problemi i PD-së. Sot përmbyllet një periudhë zhgënjyese për Partinë Demokratike dhe po sot fillon një periudhë shprese. Jam i angazhuar për ta çuar përpara këtë projekt, për një PD të pastër. Jam këtu për t’i shërbyer PD, sipërmarrja është e vështirë, por përkrahja e demokratëve më bën të sigurt për të krijuar një PD të re, të pastër”, u shpreh Kadilli duke hyrë në mbledhjen e Kryesisë që nisi në orën 17.00, ndërkohë që Këshilli Kombëtar pritet të mblidhet në orën 19.00.
Burime nga PD kanë bërë të ditur se, përveç analizimit të zgjedhjeve të 25 Prillit, mund t’i hapet rrugë edhe përshpejtimit të zgjedhjeve brenda partisë. Mësohet se do të kërkohet nga vetë z. Basha afrimi i kësaj kohe, duke mos pritur korrikun, edhe pse nga koha zyrtare e zgjedhjeve të programuara mbeten vetëm dy muaj. Gjithashtu, mësohet se Basha do t’u kërkojë forumeve më të larta që t’i bashkohen përpjekjes për të bindur çdo shqiptar më “masakrën e votë”, siç e cilëson ai procesin e 25 Prillit. /Tirana Today/
