Shkrimtari britanik, Frederick Forsyth, bëri bujë kohët e fundit kur pranoi se kishte punuar si agjent sekret për MI6, agjencinë britanike të zbulimit. Por, autori i librit të mirënjohur “Dita e Çakallit”, nuk është shkrimtar i vetëm që ka punuar edhe si spiun. Më poshtë po rendisim 8 shkrimtarë të njohur, që fshehtazi kanë shërbyer si agjentë për llogari të shërbimeve të ndryshme sekrete, në disa raste edhe si agjentë të dyfishtë.
Ernest Hemingway
Edhe njohësit më të përciptë të shkrimtarit të famshëm amerikan, mund të kenë lexuar diku se gjatë Luftës së Dytë Botërore, Hemingway, përveç punës së gazetarit, shërbeu edhe për llogari të Zyrës së Operacioneve Sekrete të SHBA, OSS. Por a ka punuar ai edhe për shërbime të vendeve të tjera, si për shembull për KGB-në sovjetike, duke qenë de fakto një agjent i dyfishtë?
Në librin e tyre “Spiunët:Ngritja dhe rënia e KGB-së”, Harvey Klehr, John Earl Haynes dhe Alexander Vassiliev, pohojnë se shkrimtari ka qenë një agjent i rusëve. Sipas tyre, Hemingway furnizoi me informacione në agjencinë ruse të spiunazhit deri në vitin 1950. Ai u hodh poshtë si një burim, në momentin kur informacionet që dërgonte nuk ishin më dhe aq shumë të vlefshme.
Graham Greene
Shumëkush që ka punuar për inteligjencën britanike, është frymëzuar të shkruajë edhe romane. Ky është rasti i shkrimtarit Graham Greene, që ka punuar për shumë vite për MI6-ën. Megjithatë, situata e Greene ka qenë unike, për shkak se ai qe tashmë i njohur si shkrimtar kur filloi të punonte si spiun. Reputacioni i Greene si një njeri që kishte qejf udhëtimet, dhe karriera e tij si shkrimtar e lejoi që të hynte e të dilte më lehtë nga zonat e rrezikshme, çka e bënte një aset të çmuar për MI6.
Gjithsesi në një moment, dyshohet se ai filloi të luajë rolin e një agjenti të dyfishtë për llogari të KGB-së sovjetike, kjo për shkak edhe të mikut të tij të ngushtë, Kim Philby, që kishte dezetuar më herët duke u dhënë rusëve informacione shumë të vlefshme, që ndikuan në sabotimin e shumë operacioneve sekrete anti-komuniste në Evropën Lindore, përfshirë Shqëipërinë.
Ian Fleming
Krijuesi i personazhit spiun më të famshëm në botë, ishte vetë një spiun! Ian Fleming, i cili shkroi serinë e romaneve “James Bond”, me protagonist Agjentin 007, punoi për inteligjencën britanike detare gjatë Luftës së Dytë Botërore. Ai ndihmoi në organizimin e disa misioneve të suksesshme të spiunazhit kundër Gjermanisë naziste, kryesisht në Evropën Veriore. Ndërkohë Flemingut, i njihet merita e krijimit të forcave të para komando moderne.
Frederik Forsyth
Sikurse e përmendëm me lart, shkrimtari i njohur britanik ka pranuar se ka punuar për MI6 në vitet 1960-1970, duke punuar me misione të rastësishme pa ndonjë pagesë, ndërsa ishte shkrimtar i pavarur mbi çështje të ndjeshme ndërkombëtare. Forsyth e përdori përvojën e tij, për të shkruar romane spiunazhi bestseller, të cilat e bënë të famshëm.
Roald Dahl
Roald Dahl pilotoi avionë luftarakë në Luftën e Dytë Botërore, dhe më pas shkoi punoi në ambasadën britanike në Uashington. Atje, me sa duket, ai bashkëpunoi me agjentët britanikë dhe kanadezë për të hetuar prirjet politike të grave të njohura amerikane. Sipas disa burimeve, duke përfshirë edhe mikeshën e tij, Antoinette Haskell, Dahl shkonte në shtrat me secilën prej tyre për të verifikuar nga afër bindjet e tyre politike.
John le Carré
Ashtu si disa shkrimtarë të tjerë të përfshirë në këtë listë, karriera e Le Carré si spiun e çoi drejt një karriere të suksesshme si shkrimtar i romaneve të spiunazhit. Le Carré ka punuar për llogari të Shërbimit të Sigurisë (MI5), dhe Shërbimit të Inteligjencës Sekrete britanike (MI6). Ndër romanet e tij më të mirë është edhe “The Spy Who came in from the Cold”.
Peter Matthiessen
Matthiessen fitoi 3 herë Çmimin Kombëtar të Librit në SHBA, dhe themeloi revistën e mirënjohur letrare ”Paris Review”. Ai gjithashtu punoi për CIA-n – dhe në fakt “Paris Riview”, ishte pjesë e maskimit të veprimtarisë së tij agjenturore. Megjithatë, bashkëthemeluesit e tjerë të revistës nuk u shqetësuan asnjëherë për këtë fakt, dhe Matthiessen ka këmbëngulur gjithmonë se “Paris Riview”, nuk kishte në asnjë rast në shërbim të CIA-s.
Jason Matthews
Amerikani Jason Matthews, është i fundit në një listë të gjatë shkrimtarësh të lidhur me spiunazhin, të cilët kanë qenë vetë agjentë sekrete. Matthews punoi me CIA-n, duke depërtuar thellë në territore të huaja dhe të rrezikshme. Tani ai po bën emër si autor i romaneve të spiunazhit. Libri i tij i dytë, “Red Sparrow”, doli në treg në fillim të këtij viti.
Përshtati për Tirana Today, Alket Goce
