Paraqitja skandaloze e Argjentinës në Botërorin e Rusisë nuk ka mjaftuar që trajneri Jorge Sampaoli të shkarkohet nga detyra. Federata argjentinase ka vendosur që ti japë atij edhe një shans për të treguar vlerat në Kupën e Amerikës e cila zhvillohet vitin e ardhshëm.
Trazirat që shoqëruan Argjentinën në Botëror, ku pas barazimit zhgënjyes me Islandën u fol se ekipi u mor në dorë nga lojtarët dhe ishin ata që bënin formacionin dhe vendosnin për gjithçka. Ndërsa një video që u bë shpejt virale dhe konfirmonte reputacionin e dobët që kishte Sampaoli, ishte kur pyet Messin nëse duhet ta hedhë në fushë Agueron apo jo, gjatë humbjen me Francën në fazën e 1/8-ve.
“Olè” shkruan se ky ishte një vendim befasues për të gjithë, por që ka pas një prapaskenë miliona eurosh. Kjo pasi Sampaoli ka një kontratë deri në 2022, që përkon me Botërorin e “Katarit” dhe në rast se Federata e prish atë i detyrohet trajnerit plot 7 milionë euro dëmshpërblim. Zgjedhja thuhet të jetë bërë nga Claudio Tapia dhe Daniel Angelici, respektivisht president dhe zv.president të “AFA”-s.
