Kryetari i Partisë Demokratike, Lulzim Basha, tha se mes 25 të arrestuarve të kapur me 5 tonë drogë në Itali, ka edhe figura që kanë pasur pozicione të larta në Policinë e Shtetit.
“Sot janë kapur në Itali 5 tonë, përflitet që ka figura që kanë pasur pozicione të larta në Policinë e Shtetit midis të arrestuarve, pritet të konfirmohet, por droga që kapet në Itali, droga që kapet në Shqipëri, përbën një të dhjetën e drogës që vazhdon të qarkullojë dhe pastrimit të parave. Kjo do të vazhdojë me një impakt të tmerrshëm mbi ekonominë, për sa kohë të kemi Edi Ramën Kryeministër, zgjidhja e vetme është largimi i tij”, tha Basha në një prononcim për gazetarët jashtë selisë së PD-së.
Ai tha se krimi, politika dhe biznesi janë bërë një dhe se sasia e kokainës e kapur dje në Durrës nuk mund të kalonte në Shqipëri pa garanci politike.
Basha akuzoi se paratë e përfituara nga biznesi i drogës, një kërcënim shumë i madh për vendin, po pastrohen në atë që ai e quajti “lavatriçen e madhe” të Bashkisë së Tiranës.
“Ne e kemi thënë gjithnjë dhe vërtetohet se kokaina dhe heroina janë dhe do të vazhdojnë të jenë 2 aktivitete kryesore. Krimi dhe politika tashmë janë bërë njësh. Ditën e djeshme u kap 613 drogë dhe vlera e kësaj droge arrinte 180mln euro. Të gjitha këto paratë do te pastrohen ne lavatriçen e ndërtimeve të Bashkisë së Tiranës. Bashkia e Tiranës, është dhe do të mbete lavatriçja kryesore për pastrimin e parave.
Kultivimi më i madh në vendin tonë është droga, Shqipëria shërben si bazë për përpunimin dhe paketimin e lëndëve narkotike dhe bazë e krimit te organizuar për të gjithë Evropën. Natyrisht ashtu si në rastin e Xibrakës , është arrestuar përkohësisht shoferi dhe nuk do të mund të arrihen të arrestohen peshqit e mëdhenj per sa kohe në pushtet është Edi Rama. E vetmja mënyrë për të zgjidhur këtë situatë është largimi i tij nga pushteti.”– tha Basha
