Një marshim gjigant për drejtësi ka nisur prej ditësh në Turqi, ku mijëra njerëz janë nisur nga Ankaraja në drejtim të Stambollit në këmbë.
Qytetarët do të përshkojnë 450 kilometra rrugë, ndërsa vështirësia është më e madhe për shkak të temperaturave të larta, të cilat arrijnë deri në 40 gradë.
Lëvizja filloi kur Enis Berberoglu, deputet i opozitës nga Partia Popullore Republikane (CHP), u arrestua dhe u dënua me 25 vite burg pas publikimit të dokumenteve zyrtare ku tregonte se qeveria turke kishte armatosur xhihadistët në Siri, gjë që Ankaraja zyrtare e mohon, shkruan DË.
Ndër marshuesit ishte Ulas Bayraktar, një ish-profesor i shkencave politike në Universitetin Mersin në Turqinë jugore, i cili u shkarkua në prill me një dekret të qeverisë.
Ai ishte një nga 1,100 akademikë që kishin nënshkruar një peticion duke bërë thirrje qeverisë për të ndërprerë konfliktet e armatosura në zonat e dominuara nga kurdët.
Kemal Kilicdaroglu, kreu i partisë kryesore opozitare të Turqisë, Partia Republikane Popullore (CHP), tha se nuk ka asnjë mënyrë tjetër për të denoncuar goditjet e vazhdueshme dhe përkeqësimin e institucioneve demokratike: “Ne ndjehemi sikur po marshojmë kundër një muri dhe do ta shkatërrojmë”.
“Është obligim ynë të formojmë një koalicion kundër rrëshqitjes së kombit drejt fashizmit”, tha Tur Yildiz Bicer, zëvendës i CHP për qytetin Manisa.
