PSG u eliminua nga Real Madrid në Champions League menjëherë pasi kaloi fazën e grupeve, pavarësisht shumave të çmendura që u investuan për tu përforcuar në merkaton e verës. Është sulmuesi gjerman Julian Draxler që ka shfryrë menjëherë pas ndeshjes për këtë eliminim, duke sulmuar strategjinë e trajnerit Emery dhe mënyrën se si e menaxhojnë drejtuesit klubin.
Julian Draxler, i cili zëvendësoi Angel Di Marian në minutën e 76, nuk filloi si startues kundër Real Madridit, ku PSG pësoi humbje me rezultat 1-2. “Kishte mungesë ndjeshmërie, nuk e kuptoj”, tha gjermani. “Nuk ka qenë logjike, nuk ka ndryshuar asgjë sa i përket objektivit kryesor. Nuk e di se çfarë ka ndodhur, isha i befasuar dhe pak i zemëruar”, shtoi Draxler.
“Real Madridi ka luajtur i qetë dhe unë nuk isha nervoz”, shtoi Draxler. “Ne e qarkullonim topin, por nuk mund ta fitoni ndeshjen duke bërë vetëm atë. Ju duhet ta sulmoni Realin kur jeni në disavantazh të rezultatit, jo vetëm të pasoni dhe të prisni që diçka të bjerë nga qielli. Ne e merituam të eliminohemi. Këtë verë kemi shpenzuar 400 milionë euro dhe të gjithë thanë se kjo do të ndryshonte gjërat, por nuk e kemi kaluar këtë raund”, tha reprezentuesi gjerman.
