Deputeti Tom Doshi, i cili siguroi mandatin edhe për legjislaturën e re, ka rikonfirmuar marrëdhënien e ngushtë me kryeministrin Edi Rama. Edhe pse kandidoi nën siglën e partisë së Gjinushit, PSD, ai deklaron se për të mbajtur premtimet e dhëna gjatë fushatës, do të ketë mbështetjen e Ramës. Gjatë një konference për shtyp, në përfundim të procesit të numërimit në Shkodër, Doshi gjithashtu vuri në dukje problematikat e rënda që sipas tij u vunë re gjatë zgjedhjeve në Shkodër.
Ai përsëriti premtimin se do të mbështesë Vllazninë në sezonin e ardhshëm, për ta ngritur atë në një nivel tjetër nga sa është paraqitur 5 vitet e fundit.
“Unë e mora i vetëm mandatin dhe me shumë faktor kundër meje duke tentuar të më dëmtojnë. Çfarë nuk është bërë, janë blerë 3 vota 1 mln lekë të vjetra apo një votë 100 euro. Bëra gabim që bëra atë miting sepse i futi frikën kundërshtarëve dhe moren masa. Prisja një rezultat edhe më të mirë”, tha Doshi.
Doshi gjithashtu tha se kishte shkëmbyer me Edi Ramën urimet e ndërsjellta për fitoret, nëpërmjet telefonatave.
