Katër familjarët e demonstruesve të vrarë më 21 janar fituan në Gjykatën e Strasburgut, përmes marrëveshjes së pajtimit me qeverinë shqiptare, pas këmbënguljes se dosja e tragjedisë nuk ishte hetuar në praninë e tyre.
Kjo do të thotë se në referim të deklaratës së firmosur mes familjarëve të viktimave dhe qeverisë shqiptare, kjo e fundit ka marrë përsipër përgjegjësinë për shkelje të konventës dhe angazhohet për rihapjen e çështjes penale në gjykatën vendase.
Përmbajtja e kësaj marrëveshjeje të pranuar nga gjykata europiane si një zgjidhje, bazohet në respektimin dhe plotësimin e standardeve të të drejtave të njeriut.
Gjithashtu, përmes këtij vendimi, shteti shqiptar duhet të dëmshpërblejë me vlerën e 39 mijë euro dy fëmijët e të ndjerit Ziver Veizi për dëmin e shkaktuar atyre, pasi nuk u pranuan të ishin pjesë në procesin penal, ku ishin të pandehur Agim Llupo dhe shefi i Gardës, Ndrea Prendi, shkruan “Top Channel”.
Por, nëse pranohet kërkesa e avokatëve, zgjerimi i hetimeve do të kryhet ndaj personave të tjerë.
Një vendim të ngjashëm, Gjykata e Strasburgut e ka dhënë për Letoninë, ku një çështje është rihapur.
