2019-ta viti i Neymar, Madridi premton “Topin e Artë”

Real Madrid pritet që në dy vitet e ardhshme të bëjë investime mjaft të mëdha, duke parë që një pjesë e lojtarëve po shkojnë në një moshë të madhe. Por në vitin 2019 mund të ndodhë edhe goditja më e madhe në histori. Atëherë, Cristiano Ronaldo do të jetë plot 34 vjeç, e sigurisht që ndryshimi në repartin e sulmit të “Los Blancos”-ve është i pritshëm.

“Mundo Deportivo” ka bërë një zbulim që ka bërë shumë bujë, pasi sipas saj Neymar që aktualisht luan me PSG-në pas kalimit atje prej 222 mln eurosh nga Barcelona verën e vitit të kaluar do tu bashkohet madrilenëve. Sipas medies katalanase, “O Ney” synon të bëhet numri 1 i botës duke luajtur në La Liga, kampionati më i përshtatshëm për karakteristikat e tij. Duke qenë numri 1, fokusi është pikërisht te “Topi i Artë”.

Tani për tani mbetet një thashetheme, por vlen të theksohet se Neymar ka në favorin e tij një peshë të madhe, presidentin e Realit Florentino Perez, i cili prej kohësh është admirues i brazilianit. Lajmi zbulohet në një moment tepër domethënës, pasi sot në mbrëmje do të zhvillohet sfida mes Realit të Madridit dhe Paris SG, në “Bernabeu”, sfidë e vlefshme për 1/8-at e Champions League.