103-vjeçarja përshkon 130 mijë kilometra për të ndjekur ekipin e zemrës

Bristol Rovers edhe pse nuk luan në elitën e futbollit anglez, ka një tifoze të veçantë e cila nuk ka munguar asnjëherë në stadium. 103 vjeçarja është shembulli më i mirë që vërteton se ka dashuri që zgjasin përgjithmonë.

Kitty Thorne e lindur në vitin e largët 1915, e moshuara, e cila sapo ka mbushur 103 vjeç, nuk ka munguar në asnjë ndeshje në shtëpi të Bristolit, ndërsa ka udhëtuar rreth 130 000 kilometra për ta parë ekipin e dashur nëpër transferta. Një tifoze që tashmë është bërë e famshme në të gjithë Anglinë.

“Kam njohur shumë njerëz dhe kam lidhur miqësi të rëndësishme. Të shkosh në stadium është bukur edhe për këtë. Më vjen keq që sot shumë tifozë zgjedhin ta shikojnë ndeshjen nga televizori. Nuk është e njëjta gjë”, thotë Kitty. Aktualisht, Kitty Thorne vazhdon të shkojë në stadium kur Bristol i luan ndeshjet në shtëpi dhe e shoqëron djali i saj 73-vjeçar, Pete.