Deputetja Rudina Hajdari ftoi sot parlamentarët që të mbanin një minutë heshtje për dëshmorët e 2 prillit.
Lidhur me këtë ftesë ka reaguar ish-deputetja demokrate, Izmira Ulqinaku, e cila shkruan se u ndje e tradhtuar kur u ftuan vetë vrasësit e dëshmorëve t’i nderojnë ata me 1 minutë heshtje.
Në një postim në Facebook, Ulqinaku shkruan se “paqen e dëshmorëve të votës së lirë e prish ekzistenca Gramoz Ruçi, ekzistenca e partisë së Sigurimit të Shtetit e Byrosë Politike, që sërish sot ka shkelur mbi votën e lirë, e mbi gjakun e atyre shpirtrave”.
Reagimi i plotë:
U ndjeva e tradhtuar sot, kur dëgjova se vrasësit e Dëshmorëve të 2 Prillit ishin ftuar t’i nderojnë ata me 1 minutë heshtje në parlament!
Një teatër mjeran që uron për paqen e shpirtrave të Dëshmorëve të Demokracisë nga Parlamenti i diktuar prej votës së blerë nga krimi i organizuar dhe bandat e pushtetit.
Paqen e dëshmorëve të votës së lirë e prish ekzistenca Gramoz Ruçi, ekzistenca e partisë së Sigurimit të Shtetit e Byrosë Politike, që sërish sot ka shkelur mbi votën e lirë, e mbi gjakun e atyre shpirtrave që s’po i lini të prehen në paqe! Gramoz Ruçi dhe Edi Rama! Shpirtrat e tyre do të paqtohen ditën kur ju të ndëshkoheni nga vota e lirë! Dhe ajo ditë po afron.
