Sot është 1 Maji, Dita e Punëtorëve, por në shumë fabrika vajzat dhe gratë janë detyruar të punojnë. Alarmin e jep Qendra Aleanca Gjinore për Zhvillim, e cila i ka nisur një thirrje urgjente qeverisë që të mos lejojë që gratë e vajzat, të cilat punojnë në sektorin e tekstileve të këpucëve, të vazhdojnë të punojnë sot në ditën kombëtare të pushimit.
“Kemi të dhëna nga shumë qytete të Shqipërisë, që sot në datë 1 Maj, u është kërkuar grave e vajzave të dalin në punë në fabrikat e këpucëve e tekstileve. Gratë e vajzat përbëjnë 95 % të punonjësve të këtyre bizneseve. Ato kanë të drejtën e tyre për pushim, sipas Kodit të Punës së Republikës së Shqipërisë”, shkruhet në thirrjen drejtuar qeverisë, ku kërkohet edhe ndërhyrja e Ministrisë së Mirëqenies Sociale dhe Rinisë, si dhe e Inspektoriatit të Punës.
Gjithashtu, Qendra Aleanca Gjinore për Zhvillim është kritike ndaj qeverisë, për të cilën shkruan se ajo ka dështuar në procesin e monitorimit dhe mbrojtjes së të drejtave të grave e vajzave në sektorin e tekstileve të këpucëve.
Në thirrjen urgjente, kjo qendër rendit disa kërkesa për qeverinë shqiptare, si më poshtë:
– Të sigurojë që të gjithë punonjëset e sektorit të tekstileve dhe këpucëve të trajtohen me respekt e dinjitet. Në vendin e punës nuk duhet të ketë trajtim çnjerëzor, duke përfshirë ngacmimet seksuale, abuzimin seksual, ndëshkimin trupor, skllavërinë, presionin psikologjik apo fizik të punonjëseve.
– Në sektorin e tekstileve dhe këpucëve punonjëseve duhet t’u sigurohet një mjedis i sigurt e i mbrojtur nga rreziqe të ndryshme. Lëndimet në punë apo sëmundjet në punë duhet të raportohen dhe ndiqen me procedura dhe sisteme te miratuara. Procedurat për raste emergjence duhet të jetë funksionale dhe të mirëspjeguara për punonjësit. Këshillat e sigurisë dhe shëndetit në punë nuk duhet të jenë formale.
– Qeveria shqiptare mund të veprojë për të rregulluar gjithë padrejtësitë kundrejt grave e vajzave që punojnë në këtë sektor.
