Zyrtari i lartë i DASH, Hoyt Brian Yee është treguar mjaft kritik teksa mori pjesë në samitin ekonomik të Serbisë.
Yee ua ka bërë të qartë drejtuesve të këtij shteti se Serbia nuk mund të mbajë qëndrime të dyfishta, duke u përmendur serbëve edhe atë që dyshohet se është qendër e shërbimeve inteligjente ruse, në afërsi të kufirit me Kosovë.
Zyrtari i lartë shtoi se nuk e kuptonte arsyen pse personeli i një qendre humanitare ruse duhet të marrë imunitet diplomatik.
“Vendet që dëshirojnë të hyjnë në BE duhet të tregojnë qartë këtë vendim. Nuk mund të uleni në dy ulëse, sidomos kur ato janë larg”, ka thënë Yee.
Po ashtu, zëvendësi i ndihmës sekretari të shtetit amerikan tha se shtetet duhet të zgjedhin një rrugë, sado e vështirë të jetë ajo.
“Është më rëndësi fokusimi, sepse kjo po ndodh shumë në Serbi dhe Ballkan. Është më rëndësi të përqendroheni në dëshirën e qytetarëve dhe në problemet kryesore”, ka theksuar ai.
Serbia ka vite që synon të përshpejtojë anëtarësimin në BE, ndërkohë që për disa çështje ka mbajtur qëndrim të kundërt me atë të BE-së siç ishte edhe rasti i qëndrimeve ndaj krizës në Ukrainë, ku ishte e përfshirë Rusia.
I pyetur nëse SHBA do të ndihmojnë në dialogun ndërmjet Beogradit dhe Prishtinës, Yee ka thënë se shteti i tij është i kyçur prej fillimit dhe se pjesëmarrja në këtë proces të drejtuar nga BE nuk është një fshehtësi.
