Megadueli, i cili do të mbahet sonte në Las Vegas, do të përfundojë me fitoren e Conor McGregor. Kështu është shprehur lojtari Zlatan Ibrahimoviç, teksa ka dhënë edhe arsyet se përse beson që humbësi i kësaj “lufte” do të jetë Floyd Mayweather.
Lojtari i Manchester United e quan McGregor “Ibrahimoviçin e arteve marciale”. Në një intervistë për Sport Bible, 35-vjeçari dha parashikimin e tij për atë që po konsiderohet eventi i vitit.
“Kemi një djalë që bëri karrierë në shumë vite dhe ky është Mayweather.Më pas kemi edhe djalin tjetër që ka bërë karrierë në pak kohë, por i dha vetes një emër të madh. Unë do ta shoh ndeshjen. Nuk e di, mund të shkojë në të dyja mënyrat. Megjithatë njerëzit parashikojnë që Mayweather do të fitojë mjaft lehtë, gjë që unë s’e besoj. Conor ka fuqinë që mund të të rrëzojë nga çdo kënd dhe ka vetëbesim, si unë. Ai është Ibrahimoviç i arteve marciale dhe unë jam McGregor i botës së futbollit.
Pra, ai ka besim dhe do të fitojë sepse beson shumë tek vetja e tij, dhe sic e thashë në gjithçka që bën, 50%ka rëndësi pjesa mendore. Njëkohësisht, ai është i aftë, ai është ai që është. Prandaj besoj se fiton Conor!”, ka thënë lojtari.
