Një zjarr i përmasave të konsiderueshme ka përfshirë një sipërfaqe toke në fshatin Helmës të Kavajës, duke shkaktuar dëme të mëdha në mjedis dhe ekonomi bujqësore. Falë reagimit të shpejtë të Policisë së Kavajës, është identifikuar dhe proceduar penalisht autori i dyshuar i zjarrvënies.
Sipas të dhënave zyrtare, 60-vjeçari Y. T., banues në fshatin Helmës, dyshohet se ka ndezur zjarr për djegien e degëve të pemëve të prera në pronën e tij, por flakët janë përhapur jashtë kontrollit. Si pasojë, janë djegur 10 hektarë tokë arë dhe rreth 30 pemë ulliri në të njëjtën zonë.
Policia ka ndërhyrë menjëherë pas njoftimit dhe ka nisur veprimet hetimore për zbardhjen e rrethanave. Bazuar në rezultatet e hetimit, janë referuar materialet në Prokurorinë pranë Gjykatës së Durrësit, ku ka nisur procedimi penal ndaj shtetasit Y. T. për shkaktim zjarri nga pakujdesia.
