Situata e zjarreve në vend mbetet alarmante, ku vatra më problematike që prej të martës mbetet ajo e landfillit të Elbasanit, që ka ngritur në këmbë të gjitha strukturat.
Por gjatë 24 orëve të fundit janë raportuar 21 vatra zjarri të tjera, nga të cilat 4 vatra janë ende aktive.
Këto vatra zjarri janë evidentuar në bashkitë e: Elbasanit, Librazhdit, Prrenjasit, Vlorës, Finiqit, Tiranës, Kavajës, Lezhës, Kurbinit, Shkodrës, Vaut të Dejës, Malësisë së Madhe, Hasit, Devollit e Beratit.
Agjencia Kombëtare e Mbrojtjes civile njoftoi sot se aktualisht mbeten aktive vatrat:
Në vendgrumbullimin e mbetjeve, në bashkinë Elbasan, ladfilli, ku edhe sot vijon puna për shuarjen e plotë të vatrës.
“Gjatë ditës së djeshme u punua kryesisht me hedhjen e inerteve dhe kapsulimin e mbetjeve, ndërsa një grup ekspertësh ishte në terren për matjen e ndotjes së ajrit”, njoftoi AKMC.
Aktive mbetet edhe vatra e zjarrit midis fshatit Grazhdan, njësia administrative Livadhja dhe fshatit Malçan, njësia administrative Dhivër, bashkia Finiq. Situata sot raportohet se është e qetë, por në monitorim.
Kurse një tjetër vatër aktive është ajo në fshatin Bulticë, njësia administrative Vaqarr, bashkia Tiranë, në një sipërfaqe me shkurre e ferra.
“Ditën e sotme, forcat operacionale, dhe me ndihmën e Helikopterit Cougar do të vazhdojnë punën për vënien nën kontroll të zjarrit”, njoftoi agjencia për situatën në këtë vatër.
Aktive mbetet edhe vatra e zjarrit në zonën malore mes fshatrave Gjinaj dhe Domaj, njësia administrative Gjinaj, Bashkia Has, në një sipërfaqe me pyll pishe. Terreni i vështirë dhe era e mbajnë zjarrin aktiv. Forcat operacionale vazhdojnë punën dhe gjatë ditës së sotme.
“Si pasojë e zjarreve të rëna kryesisht në sipërfaqe me pemë, shkurre e barishte janë djegur rreth 6 hektarë me bimësi. Në operacionet për shuarjen e zjarreve u angazhuan 36 automjete zjarrfikëse dhe 232 forca operacionale. Gjithashtu në operacionet e ditës së djeshme morën pjesë edhe Forcat e Armatosura me 35 efektivë, 4 automjete zjarrfikëse, 4 kamionë vetëshkarkues, dhe 1 traktor me zinxhirë, 1 grup ekspertësh për matjen e ndotjes së ajrit dhe 1 helikopter Cougar”, sqaroi AKMC.
Ndërsa bazuar në parashikimet e Institutit të Gjeoshkencave, sot (4 korrik) pritet nivel rrezik “i lartë” për zjarret pothuajse në të gjitha qarqet.
“Në qarqet, Korçë dhe Vlorë pritet nivel rrezik “i moderuar” dhe lokalisht rrezik “i lartë” vetёm nё zona tё lokalizuara, konkretisht:Korçë (Qendër), Vlorë (VeriQendër). I gjithë sistemi i mbrojtjes civile vijon të jetë në ndjekje të situatës dhe në gatishmëri të plotë për ndërhyrje të shpejtë”, sqarojnë autoritetet.
Gjithashtu ata bëjnë thirrje të gjithë qytetarëve që të tregojnë përgjegjësi maksimale.
“Mos ndizni zjarre në ambiente të hapura, mos digjni mbeturina dhe shmangni çdo veprim që mund të shkaktojë zjarr. Edhe pakujdesia më e vogël mund të ketë pasoja të rënda për mjedisin, pronën dhe jetën e njerëzve. Në rast zjarri, njoftoni menjëherë shërbimet zjarrfikëse. Vetëm me kujdesin dhe bashkëpunimin e të gjithëve mund të parandalohet përhapja e zjarreve dhe të mbrojmë natyrën dhe komunitetet tona”, mbyllet reagimi i Mbrojtjes Civile.
