Një zjarr ka rënë sot në banesën e shtetasit Andrea Lako, i cili jetonte i vetëm në një pallat të vjetër në qytet. Ngjarja ka shkaktuar panik mes banorëve, të cilët janë evakuuar menjëherë nga forcat zjarrfikëse dhe policia.
Një e moshuar ka përfunduar në spital pasi pati probleme me frymëmarrjen nga tymi i madh, por mësohet se ndodhet jashtë rrezikut për jetën.
Zjarri është shuar plotësisht nga ekipet zjarrfikëse, ndërsa policia ka nisur hetimet për të zbardhur shkaqet. Dyshohet se shkaku mund të ketë qenë një shkëndijë elektrike, duke pasur parasysh gjendjen e amortizuar të instalimeve në pallat, i ndërtuar që në vitin 1972.
Banorët e pallatit kanë ndarë detaje mbi ngjarjen.
“E morëm vesh nga zhurma dhe tymi. Kur dolëm jashtë, pamë zjarr dhe lajmëruam menjëherë zjarrfikësen. I zoti i shtëpisë na tha se kishte dalë për të blerë bukë dhe kur u kthye, pa banesën në flakë. Tymi u përhap shpejt dhe të gjithë dolëm jashtë me frikë. Mezi nxorëm një plakë nga kati i dytë, e cila nuk merrte dot frymë. Andrea është njeri i vetmuar, gjynah për të. Dy fëmijët i ka në burg, dhe vetë mezi jeton me ndihmë sociale. Banorët e ndihmonim herë pas here, por tani ai ka humbur gjithçka.”- shprehet një nga banorët
“Ky është pallat i vjetër, dhe instalimet elektrike janë të amortizuara. Të gjithë u frikësuam nga zjarri dhe tymi që mbushi shkallët. Erdhi ambulanca dhe mori një të moshuar që nuk ndihej mirë. I lutemi qeverisë të ndihmojë Andrea Lakon, sepse është njeri pa mbështetje, i vetmuar dhe në një gjendje të vështirë ekonomike.”-shpreheht një banor tjeter.
Hetimet për ngjarjen vazhdojnë, ndërsa banorët apelojnë për ndihmë për të prekurin nga zjarri.
