Një zjarr i madh ka rënë ditën e sotme në fshatin Qafshkallë të Belshit. Bëhet me dije se zjarri ka përfshirë disa hektarë pyje dhe ullishte.
Zjarri po përhapet me shpejtësi ndihmuar edhe nga era. Zjarrfikësit, shërbimi pyjor, por edhe vetë banorët e fshatit po punojnë për të bërë të mundur shuarjen e flakëve.
Kujtojmë që ministri i Mbrojtjes, Niko Peleshi bëri sot një bilanc të zjarreve, ku vuri në dukje se ka ende disa vatra zjarri të ndezura në vend.
“Pas një pune të gjatë të trupave të emergjencave civile në bashkëpunim me efektivë të FA, nën koordinimin e Agjencisë së Mbrojtjes Civile është bërë e mundur shuarja e pjesës më të madhe të vatrave.
Në qarkun e Korçës ka një vatër aktive zjarri, në fshatin Arrëz, të bashkisë Kolonjë, e cila u riaktivizua pas izolimit të dy ditëve më parë. Po punohet në terren për fikjen e tij. Puna vijon edhe në malin Stilos, në bashkinë Konispol dhe fshatin Grazhdan, të bashkisë Finiq ku efektivë zjarrfikës po punojnë për shuarjen e vatrave të zjarreve.
Në fshatin Jarua, në bashkinë e Fierit zjarri është shuar dhe po bëhet kontrolli i zonës. Puna ka vijuar deri në shuarjen përfundimtare të zjarreve në njësinë administrative Vergo të bashkisë Delvinë, në njësinë administrative Lopes të bashkisë Tepelenë, në Semens të Lushnjës, në fshatin Gur i Zi të bashkisë Elbasan dhe në lagjen Çlirim, bashkia Berat”, njoftoi Peleshi.
