Lideri i LR-PDSH, njëherësh udhëheqës i koalicionit “Aleanca për Shqiptarët”, Ziadin Sela, gjatë daljes së parë publike pas sulmit në Kuvend, deklaroi se, ngjarjet e 27 prillit ishin “atentat ndaj nevojave të shqiptarëve në Maqedoni dhe ndaj artikulimit politik të këtyre nevojave”.
Duke iu përgjigjur interesit të mediave, nëse do të kërkojë përgjegjësi politike për sulmin ndaj tij, Sela tha se së pari do të kërkojë që të zbardhen, siç tha ai, “rastet e montuara ndaj shqiptarëve”.
“Përpara se të kërkoj përgjegjësi politike për 27 prillin dhe përgjegjësi individuale në aspekt të së drejtës të dikujt, unë do të kërkoja që sa më shpejt të zbardhet procesi i montuar politik i Monstrës, vrasjes së Harun Aliut dhe shumë proceseve të montuara politike”, u shpreh Sela, duke shtuar se ai nuk heq dorë nga deklarata e partive shqiptare në Maqedoni.
Sela foli edhe për bisedimet pas mandatimit të kreut të LSDM-së për formimin e Qeverisë së re të Maqedonisë. Ai theksoi se koalicioni “Aleanca për Shqiptarët” çdo herë ka qenë për qeverisje të re, të reformuar dhe në shërbim të qytetarëve.
“Jemi për qeverisje të re dhe qeverisja e re do të ketë përkrahjen tonë. Pak rëndësi ka a do të jemi ne fizikisht prezent pjesë e qeverisë ose jo, sepse për këtë do të duhet të marrin vendim organet e partisë. Mirëpo, ne qeverinë e reformave do ta përkrahim ashtu siç do t’i përkrahim dhe do të jemi katalizator kryesor i realizimit të interesave të shqiptarëve në këtë qeverisje të re”, deklaroi Sela.
