Një grua 48-vjeçare nga fshati Bujan i Tropojës rezulton e zhdukur që prej datës 22 korrik, duke vënë në lëvizje strukturat e Policisë së Tropojës. Denoncimi për zhdukjen e saj është bërë katër ditë më vonë, ndërsa dyshohet se largimi ka ndodhur si pasojë e dhunës në familje.
Për këtë ngjarje, më 26 korrik Policia e Kukësit bëri me dije se është arrestuar bashkëshorti i saj, 58-vjeçari Imer Shpata. Ai po mbahet në ndalim deri në zbardhjen e plotë të rrethanave të ngjarjes.
Sipas burimeve policore, 48-vjeçarja është larguar nga banesa familjare dhe që prej asaj dite nuk është parë më. Hetimet janë në vijim dhe nuk përjashtohet as pista e një krimi të mundshëm.
Ndërkohë, kërkimet për gjetjen e saj vijojnë pa ndërprerje nga forcat e rendit dhe strukturat e tjera të angazhuara në terren.
