Ndërhyrja për zgjerimin e autostradës Tiranë-Durrës mbetet një ndër projektet kryesore në vend. Qeveria ka miratuar programin e politikave prioritare 2025-2027 ku janë konfirmuar një sërë projektesh të rëndësishme infrastrukturore e hekurudhore. Pas ndërhyrjes në autostradën Tiranë-Durrës do të shtohet me 2 korsi nga secila anë dhe pritet të kushtojë 298.8 milionë euro.
Punimet mendohen të nisin në vjeshtë pas rënies së fluksit turistik në vend. Nga studimi nuk parashikohet të preken rrugët dytësore dhe bizneset, pra nuk do ketë shpronësime masive por mund të ketë disa zona që afrohen më shumë me shtratin e rrugës. Njëkohësisht me këtë projekt parashikohet që të ndërhyhet edhe në rrugën e vjetër Tiranë-Ndroq-Plepa. Ky projekt parashikohet të ketë një kosto prej 87 milionë eurosh.
Korridori i 8 gjithashtu vijon të konsiderohet prioritet ndërsa do të rehabilitohet aksi Elbasan–Lekaj. Një tjetër projekt i rëndësishëm në programin e politikave konfirmohet edhe rehabilitimi i hekurudhës Vorë–Hani i Hotit. Vlera e këtij projekti parashikohet të jetë 313 milionë euro.
Në total në dokumentin e projekteve listohen 51 të tilla të cilat vlerësohen në fazë të avancuar pasi ka përfunduar studimi i fizibilitetit.
