Sot, më 11 maj 2025, në orën 19:00 ka përfunduar zyrtarisht procesi i votimit në të gjithë territorin e Shqipërisë. Qendrat e votimit janë mbyllur, me përjashtim të atyre ku ka pasur radhë të votuesve që kanë qenë brenda ambienteve të qendrës përpara këtij orari — në këto raste, ligji lejon vazhdimin e procesit deri në votimin e personit të fundit në radhë.
Procesi zgjedhor është zhvilluar përgjithësisht i qetë, megjithëse janë raportuar disa parregullsi dhe incidente të izoluara në disa zona të vendit, përfshirë denoncime për shkelje të Kodit Zgjedhor nga ana e kandidatëve të disa partive politike.
Sipas të dhënave të fundit të Komisionit Qendror të Zgjedhjeve, pjesëmarrja në rang kombëtar deri në orën 17:00 ishte rreth 38.44%. Raportimet përfundimtare për pjesëmarrjen totale priten të publikohen nga KQZ pas përfundimit të numërimit të të dhënave nga të gjitha qendrat e votimit.
Pas mbylljes së kutive të votimit, pritet të nisë menjëherë procesi i numërimit të votave, i cili do të zhvillohet nën mbikëqyrjen e vëzhguesve vendorë dhe ndërkombëtarë, për të garantuar transparencën dhe ligjshmërinë e procesit.
