Për rreth një muaj, 6500 efektivë të Policisë së Shtetit, nga niveli bazë deri te strukturat më të larta, janë trajnuar për të garantuar sigurinë dhe zbatimin e ligjit gjatë procesit zgjedhor të 11 majit. Trajnimet janë zhvilluar me fokus të veçantë në parandalimin dhe menaxhimin e krimeve zgjedhore, si dhe ruajtjen e rendit publik në të gjithë vendin.
Në një deklaratë për mediat, Drejtori i Rendit Publik, Agron Çeli, bëri të ditur se “prej disa muajsh Policia e Shtetit është angazhuar me trajnimin e personave që do të marrin pjesë në këtë proces zgjedhor”, duke shtuar se trajnimi ka përfshirë të gjitha drejtoritë vendore në bashkëpunim me SPAK, OSBE, KQZ dhe Prokurorinë e Përgjithshme.
Gjithashtu, 1500 efektivë të Strukturave të Hetimeve të Krimeve janë trajnuar veçmas për të përforcuar aftësitë në hetimin dhe ndëshkimin e shkeljeve zgjedhore në bashkëpunim të ngushtë me prokuroritë e juridiksioneve përkatëse.
Sipas Çelit, efektivët kanë marrë njohuri mbi ruajtjen e objekteve zgjedhore, angazhimin në aktivitetet elektorale gjatë fushatës dhe etyrat deri në përfundimin e numërimit të votave.
I pyetur për rastet konkrete të krimeve zgjedhore të evidentuara deri më tani, Çeli u shpreh se janë duke zbatuar çdo ditë dispozitat e Kodit Penal për krimet zgjedhore në bashkëpunim me SPAK dhe prokuroritë lokale. “Çdo rast që kemi marrë njoftim është trajtuar dhe është goditur çdo paligjshmëri e evidentuar në terren”, theksoi ai.
Në këtë fazë të dytë, atë të fushatës zgjedhore, Policia e Shtetit është e angazhuar çdo ditë për të garantuar rendin dhe sigurinë në aktivitetet elektorale të subjekteve politike, në funksion të një procesi zgjedhor të qetë dhe të rregullt.
