Koalicioni i parë zgjedhor për zgjedhjet e 14 majit është regjistruar sot në Komisionin Qendror të Zgjedhjeve (KQZ).
Grupimi “Djathtas 1912” i drejtuar nga Enkelejd Alibeaj dhe LZHK e Dashamir Shehit ka dorëzuar kërkesën për regjistrim në KQZ, disa orë para përfundimit të afatit ligjor.
Koalicioni është emërtuar “Djathtas për Zhvillim” (DZH) dhe synon një bashkëpunim politik dhe elektoral mes dy forcave të djathta për zgjedhjet vendore.
Në shkresën e dorëzuar pranë KQZ-së, përmenden synimet kryesore të koalicionit, ku theksohet angazhimi për zhvillim ekonomik, demokraci dhe transparencë.
Afati për regjistrimin e koalicioneve skadon mesnatën e sotme, ndërsa priten edhe aplikime të tjera nga grupime të ndryshme politike.
