Dy muaj para zgjedhjeve, Partia për Drejtësi, Integrim dhe Unitet vjen me një propozim konkret për të shmangur vjedhjen e votës, në zgjedhjet parlamentare të 18 qershorit.
Kryetari i kësaj partie, Shpëtim Idrizi, propozon që KQZ-së t’i bashkohet një grup prokurorësh specialë.
“Kam dëgjuar gjatë gjithë kësaj kohe të flitet për vjedhjen e votës dhe padyshim këto janë fenomene që kanë ndodhur. Kanë ndodhur nga ato parti që sot po ankohen çdo ditë. Çdonjëri nga ju ka një pyetje. Pse blerja e votës qënka e dënueshme nga ligji, vetëm kur u vidhet qytetarëve? Po kur dy partitë e mëdha na vjedhin neve partive të vogla votat, pse nuk është vjedhje kjo dhe tjetërsim i interesit qytetar? Prandaj, ne propozojmë që një grup prokurorësh specialë të jetë pranë KQZ-së, në mënyrë që të veprohet urgjentisht në raste të blerjes apo transferimit të votave. Ne nuk pranojmë dot si parti e interesit kombëtar dhe interesit qytetar, që sot shqiptarët të blihen me 5 mijë lekë apo me një thes miell. Nuk pranojmë që sot të blihet dinjiteti i shqiptarëve”.
Përsa i përket reformës zgjedhore kryetari i PDIU-së theksoi se duhet të ketë një zonë zgjedhore dhe koalicionet të bëhen pas zgjedhjeve.
Ndërsa sa I përket krizës politike në vend, pas kërkesës së opozitës për qeveri teknike, kryetari i Partisë Drejtësi, Integrim dhe Unitet propozoi që të ketë një dakortësi të të gjitha palëve, në mënyrë që të mos ketë dyshime për garancinë në zgjedhjet e ardhshme.
Idrizi theksoi, gjithashtu, që edhe Presidenti i Republikës të zgjidhet nga populli.
“Për sa i përket garantimit të zgjedhjeve, unë jam i bindur se opozita ka të drejtë kur kërkon garanci më të mëdha. Absolutisht, para zgjedhjeve, ne nuk mund të kemi dot një qeveri teknike. Po qe nevoja, le të zgjedhim një Drejtor Policie, ku të gjitha palët të jenë dakort. Jemi plotësisht dakort që të ndryshojmë Kodin Zgjedhor, edhe për financimin e partive. Le të bëhet financimi i partive politike tërësisht nga buxheti i shtetit dhe të shpenzojmë shumë herë më pak nga ajo që harxhohet sot. Le të zgjedhi populli edhe Presidentin e Republikës, si garant i institucioneve të Shqipërisë. Me këtë dua t’ju them se kriza është artificiale. Konfliktualiteti politik në Shqipëri mbahet për të fshehur paaftësinë e politikës shqiptare, për t’u dhënë qytetarëve atë që u kemi detyrim: zhvillim, punë, ekonomi, prosperitet, dinjitet etj”.
