Ish-futbollisti i Real Madrid, Pepe do të mbahet mend në histori si një ndër mbrojtësit ‘nevrik’ që ka bërë gjatë karrierës ndërhyrje horror. Por portugezi ka vërtetuar se karakteri që ai ka në fushë nuk është i njëjti me atë jashtë saj dhe se është pasioni për futbollin që nxjerr në pah nervozizmin e tij.
Pas viteve fantastike në Madrid me Realin, Pepe prej dy sezonesh ai ndodhej në Turqi teksa vishte fanellën e Beshiktashit. Megjithatë, edhe kësaj aventure i ka ardhur fundi për shkak të krizës financiare që po kalon Beshiktashi dhe në janar Pepe do bëhet me ekip të ri.
35-vjeçari e mbylli marrëveshjen me dëshirën e tij, madje refuzoi edhe rrogën e fundit nga klubi turk, duke kërkuar që ato para të shërbenin për të paguar rrogat e punëtorëve të klubit. Duke parë karrierën dhe eksperiencën që ka, Pepe do të ishte një përforcim i rëndësishëm për çdo skuadër, sidomos që mund të firmosë edhe me parametra zero.
Ofertat në drejtim të tij nuk mungojnë dhe shumë shpejt do mësojmë ekipin e ri ku do vazhdojë karrierën ish-futbollisti i Realit.
