Merkato e verës ishte mjaft e ‘nxehtë’ për mbrojtësish shqiptar të Napolit, Elseid Hysajn. Emri i shkodranit ishte mjaft i lakuar me një kalim të mundshëm tek Chelsea, por që nuk u finalizua për një arsye të vetme dhe ajo mban emrin e presidentit De Laurentiis.
Mbrojtësi i kombëtares shqiptare njihet mjaft mirë nga tekniku aktual i “Bluve të Londrës”, Maurizzo Sarri pasi e ka pasur nën urdhra tek Empoli dhe Napoli dhe kërkoi që ta merrte me vete dhe tek skuadra e Chelseas.
Sipas Daily Star, të kaltërve do t’iu duhet të shpenzojnë më shumë para për të siguruar transferimin e Hysajt. “Nuk ka pasur asnjë lëvizje, por ne do të flasim për të gjatë merkatos së janarit. Ai mund të kishte shkuar tek Chelsea gjatë verës. Sarri dëshironte ta merrte dhe ai ka një klauzolë largimi prej 50 milionë eurosh.
Ndoshta Napoli do ta kishte pranuar një ofertë prej rreth 45 milionë eurosh, mirëpo bisedimet nuk filluan pasi De Laurentiis futi një klauzolë që e ndalonte Chelsean të blejë lojtarë të tjerë të Napolit, përveç Jorginhos”, u shpreh Giufreddi, agjenti i Hysajt.
Mediat britanike vazhdimisht kanë raportuar për një kalim të mundshëm të Hysajt në Premier League. Për më tepër, Hysaj nuk është duke gjetur gjuhën e përbashkët me drejtuesit e klubit të tij për vazhdimin e kontratës, duke nxitur kështu spekulimet për largimin e tij nga Serie A.
