Shqipëria njihet si një nga vendet me nëntokë të pasur me minerale nga më të ndryshmet, por që shumë pak janë vlerësuar si pasuri për zhvillimin ekonomik të vendit. Përgjatë gjithë periudhës së tranzicionit përpunimi i këtyre mineraleve është bërë kryesisht nga kompanitë private.
Sektori minerar është një nga fushat ku kryesisht është ndjekur rruga e privatizimit, por edhe dhënies me koncesion.
I gjithë ky raport midis shtetit dhe përfaqësuesve të sektorit privat ka qenë dhe vazhdon të jetë i tillë për faktin se mineralet janë një pasuri kombëtare. Kjo del në pah edhe nga analiza e kryer së fundmi nga Ministria e Industrisë dhe Energjetikës. Sipas kësaj analize rezulton se në 1 ton bakër gjenden 4 gramë ar.
Ky raport i arit që gjendet në bakër del nga miniera polimetalore e Munellës në Pukë. Ndërsa nga përllogaritja e përgjithshme rezulton që sasia e arit në këtë minierë të jetë rreth 4 tonë.
Kompanitë e shumta që kanë punuar në këtë minierë që prej vitit 2000, janë marrë kryesisht me rivlerësimin e rezervave të bakrit dhe zinkut e më pak me shtimin e rezervave të reja.
Vetëm së fundmi, është rritur interesi i kompanive koncensionare edhe kundrejt mineraleve më të pakta në këtë minierë duke bërë një rivlerësim të rezervave të arit – një rezultat befasues dhe goxha i shtrenjtë prej 4 tonësh ar!
