Një javë më parë, “Piranjat” treguan me dëshmi dhe fakte se si janë shpërdoruar fondit në Teatrin Kombëtar nga drejtori Altin Basha. Ky i fundit kishte punësuar si kostumografe dhe skenografe bashkëshorten e tij, Iliriana Basha, për shfaqjen “Vojçek” dhe për t’i shpëtuar çdo auditi në dokumenta e kishte shkruar se punonte me zero pagesë. Por në fakt ai i kishte dhënë bashkëshortes 11 milionë lekë për kostumet e kësaj shfaqje, rreth 840 mijë lekë për veshjet e çdo aktori. Ndërkohë, Altin Basha kishte shpërbleyr me 4 milionë lekë edhe një prej bashkëpuntoreve të tij, Benada Shutën, për grimin e aktorëve në shfaqjen në fjalë. Por Shpresa Vasili, ish-grimiere e këtij teatri i hodhi poshtë dokumentat, duke u shprehur se grimin e kësaj shfaqjeje e kishte bërë vetë.
Por Benada Shuta nuk ishte i vetëm emër fiktiv në këtë shfaqje. Ervis Salisi, po ashtu bashkëpunëtor i Altin Bashës, është paguar 4 milionë lekë si regjisor efektesh audiovizuale, ndërsa Alban Kondi si mjeshtër për ndriçimin. Mirëpo, Adelina Muça dhe Arben Derhemi, që kanë qenë aktorë në këtë shfaqje thanë se nuk ka pasur asnjë puntorë tjetër përveç atyre të Teatrit Kombëtar.
Ndër të tjera, Anxhela Çikopano, studiuese teatri, tha se që nga momenti që Altin Basha ka marrë drejtimin e Teatrit Kombëtar nuk ka kalendar për shfaqjet, gjë që tregon se menaxhimi nuk po shkon siç duhet. Arben Derhemi u shpreh se Teatri Kombëtar është privatizuar nga Altin Basha, sepse sipas tij ai mban nën kontroll edhe bordin artistik. Kjo gjë provohet edhe nga shfaqja “Orfeu zbret në ferr”, që është miratuar nga bordi artistik gati një muaj pasi regjisorja polake, Nastazja Domaradzka, kishte kryer audicionet me aktorët. Kjo do të thotë se fituesi ka qenë i paracaktuar, sepse në një situatë normale regjisorja duhet të kishte aplikuar me dosjen e saj pasi të bëhej thirrja për audicione dhe të priste miratimin nga bordi e më pas të niste nga audicionet.
Ndërkohë deri më sot, nuk ka ende asnjë reagim institucional për skandalet në Teatrin Kombëtar. Për këtë arsye, artistët iu bën thirrje institucioneve përgjegjëse, që të marrin masa për gjithçka që ka ndodhur brenda këtij teatri.
