Policia ka zhvilluar një operacion antidrogë në Vlorë, ku janë asgjësuar 4930 bimë narkotike si dhe janë vënë në pranga tre persona.
Mësohet se gjatë aksionit në fshatin Bishan të Vlorës, efektivët kanë gjetur dhe sekuestruar një parcelë kanabisi me rreth 4930 rrënjë kanabis sativa. Gjithashtu, janë asgjësuar 198 kilogramë kanabis në proces tharje. Gjatë kontrollit fizik, janë sekuestruar dhe 2 armë zjarri kallashnikov, 1 armë gjahu dhe një sasi fishekës luftarakë në magazinë.
Në pranga janë vënë kryeplaku i fshatit, 61-vjeçari Bujar Hoxha, 69-vjeçari me inicialet D.M i cili ishte pronari i tokës ku u gjet plantacioni dhe dy shtetasit, 40-vje, 40-vjeçari Skënder Llanaj dhe 18-vjeçari Danielo Llanaj, babë e bir.
Gjithashtu, janë pezulluar nga detyra tre punonjës policie pasi dyshohet se shpërdoruan detyrën duke mos përmbushur përgjegjësinë për kontrollin e zonës. Të pezulluarit janë:
Nënkomisari me inicialet K. P me detyrë shef i Seksionit për Krimet në Komisariatin e Policisë Vlorë;
Nënkomisar me inicialet F. M me detyrë specialist për Hetimin e Krimeve, në Komisariatin e Policisë Vlorë
Inspektor me inicialet M. A me detyrë ndihmësspecialist (SPZ) në Komisariatin e Policisë Vlorë.
Materalet proceduriale i kaluan prokurorisë për veprime të mëtejshme.
Njoftimi i Policisë
Vlorë- Finalizohet nga strukturat e DVP Vlorë, në bashkëpunim me strukturat e DVP Fier, operacioni policor i koduar “Amid”.
Asgjësohen me anë të djegies 4930 bimë narkotike që ishin kultivuar në një parcelë me misër, në fshatin Bishan.
Zbulohet në afërsi të parcelës, një magazinë e përshatur për tharjen e bimëve narkotike.
Sekuestrohen 198 kilogramë kanabis në proces tharjeje, 2 armë zjarri kallashnikov, 1 armë gjahu dhe një sasi fishekësh luftarak, që u gjetën gjatë kontrollit të magazinës.
Kapen dhe vihen në pranga 3 autorët e dyshuar, të cilët dyshohet se kultivonin bimët narkotike dhe përgatitnin lëndën narkotike kanabis, për shitje.
Ndiqen penalisht kryeplaku i fshatit Bishan dhe 3 punonjës policie, pasi dyshohet se shpërdoruan detyrën duke mos përmbushur detyrat dhe përgjegjësitë për kontrollin e zonës.
Strukturat e Drejtorisë Vendore të Policisë Vlorë, në bazë të informacioneve të siguruara nga inteligjenca policore, për një rast të kultivimit të bimëve narkotike, kanë organizuar dhe finalizuar, në bashkëpunim me strukturat e DVP Fier, operacionin policor të koduar “Amid”.
Gjatë operacionit, në fshatin Bishan, shërbimet e Policisë kanë konstatuar të kultivuara mes një parcele me misër, në pronësi të shtetasit D. M., 4930 bimë të dyshuara narkotike cannabis sativa, të cilat u asgjësuan me anë të djegies.
Nga kontrolli i territorit, në afërsi të kësaj parcele është zbuluar një magazinë e përshtatur për tharjen e bimëve narkotike dhe përgatitjen e lëndës narkotike, në pronësi të shtetasit S. Ll.
Në këtë magazinë janë gjetur 198 kg lëndë narkotike në proces tharjeje, 2 armë zjarri kallashnikov, 1 armë gjahu dhe një sasi fishekësh luftarak, të cilat janë sekuestruar në cilësinë e provës materiale.
Në vijim të veprimeve procedurale për këtë rast, specialistët për Hetimin e Narkotikëve të DVP Vlorë arrestuan në flagrancë shtetasit:
– S. Ll., 40 vjeç dhe D. Ll., 18 vjeç (babë e bir), banues në fshatin Bishan.
– D. M., 69 vjeç, banues në fshatin Bishan.
Po nga këto struktura u referuan materialet në Prokurori, për veprën penale “Shpërdorimi i detyrës”, për shtetasit:
-B. H., 61 vjeç, me detyrë kryetar i fshatit Bishan.
Si dhe për 3 punonjës policie, të cilët edhe janë pezulluar nga detyra, konkretisht:
– Nënkomisar K. P., me detyrë shef i Seksionit për Krimet në Komisariatin e Policisë Vlorë;
– Nënkomisar F. M., me detyrë specialist për Hetimin e Krimeve, në Komisariatin e Policisë Vlorë;
– Inspektor M. A., me detyrë ndihmësspecialist (SPZ) në Komisariatin e Policisë Vlorë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
Policia e Shtetit siguron edhe një herë qytetarët se është e vendosur për të luftuar krimin, në çdo fushë, gjë që po e tregon me rezultatet e këtij operacioni, sidomos me vendosmërinë për të larguar nga radhët e saj, çdo punonjës policie që kryen veprime në shkelje të detyrës. Në këtë kuadër, fton çdo qytetar që të mos hezitojë të informojë për rastet kur punonjësit e Policisë abuzojnë me detyrën.
