Ende nuk ka një pistë për hetimet sa i takon vendosjes së tritolit, në mjetin e një polici. Ngjarja ka ndodhur sot në Shkodër, në orët e para të ditës dhe fatmirësisht nuk ka asnjë të lënduar, por vetëm dëme materiale.
Sasia e tritolit që ka shpërthyer është vendosur në mjetin e policit Agim Bushgjoka. Burimet e policisë bëjnë me dije se ai kishte të parkuar mjetin poshtë banesës, kur ka ndodhur shpërthimi.
Polici ka deklaruar se nuk ka konflikte me asnjë person, e ndërsa hetimet bëhen edhe më të vështira pasi në vendin ku ndodhej mjeti, nuk ka kamera sigurie. Agim Bushgjoka është polic në zonën e Bardhaj dhe Grudës, në njësinë Rrethina të Bashkisë Shkodër.
Pretendohet se shkak për këtë ngjarje mund të jetë pozicioni i punës i Bushgjokës si polic, në drejtorinë vendore të Shkodrës.
