Detaje të reja janë zbardhur nga ngjarja e ndodhur sot në Sarandë, ku një 54-vjeçar dhe një 62-vjeçar janë plagosur me thikë.
Mësohet se Edmond Sulo dhe Spiro Llambri janë paraqitur në urgjencën e spitalit të plagosur, ku Sulo ka dy plagë të shkaktuara nga mjet prerës, në kokë dhe një poshtë sqetullës.
Policia thotë se autori i dyshuar është shtetasi Fatmir Jashari dhe se po punohet për kapjen e tij.
Sot, rreth orës 14:00, në lagjen nr.2, Sarandë, dyshohet se pas një konflikti për motive të dobëta, shtetasi F. J., 52 vjeç, ka plagosur me mjet prerës (thikë), shtetasit E. S., 54 vjeç dhe S. Ll., 62 vjeç, të dy banues në Sarandë. Dy të dëmtuarit ndodhen në spital, jashtë rrezikut për jetën.
Shërbimet e Policisë kanë shkuar menjëherë në vendngjarje dhe janë vënë në ndjekje të autorit të dyshuar, me qëllim kapjen e tij.
Grupi hetimor ndodhet në vendngjarje dhe nën drejtimin e Prokurorisë dhe po punon për sqarimin dhe zbardhjen e plotë të rrethanave të ngjarjes.
