Xherdan Shaqiri në një kohë të shkurtër është kthyer në një ndër futbollistët më të dashur të tifozëve të Liverpoolit. Mesfushori nga Kosova ka shkëlqyer që pas transferimit nga Stoke City me “The Reds” duke shënuar gola të rëndësishëm dhe duke dhuruar asist për bashkëlojtarët.
Liverpool kishte vendosur që t’i befasojë fëmijët e një shkolle fillore, duke i dërguar tre yjet e skuadrës, Xherdan Shaqiri, Andrew Robertson dhe Mohamed Salah. Fillimisht fëmijët pyeteshin se për kë bënin tifo, për Liverpoolin apo Evertonin dhe lojtarin e tyre të preferuar.
Pasi përgjigjeshin fëmijët e vegjël, Salah, Shaqiri dhe Robertson dilnin në skenë duke i befasuar ata. Disa nga fëmijët e vegjël ishin edhe tifozë të rivalit lokal të Liverpoolit, Evertonit por gëzoheshin kur shihnin yjet e The Reds.
Shaqiri dhe Salah ishin dy lojtarët më të preferuar nga tifozët e vegjël të Liverpoolit. Gjesti i klubit dhe lojtarëve për t’i befasuar fëmijët e vegjël është mirëpritur shumë në rrjetet sociale që kanë përshëndetur këtë iniciativë të Liverpoolit.
