Futbolli është kthyer në një ndër sportet më të bukura në botë, pasi dhuron emocione të shumta gjatë 90’ minutave që lojtarët zbresin në fushën e blertë. Shumë futbollistë kanë shkruar historinë dhe do të mbahen mend gjithmonë për atë që jepnin në fushë. Disa futbollistë që kanë ndërtuar një karrierë të mrekullueshme dhe që adhuroheshin nga tifozeritë e tyre janë detyruar të tërhiqen në një moshë të re. Për shumë arsye të ndryshme si dëmtimet, sëmundje, stili i jetesës apo edhe ndërrimi i profesionit ka bërë që këto karriera të mëdha të shkëputen kur ishin në kulmin e tyre.
Van Basten, ishte një nga lojtarët më të mirë të historisë së Holandës. Ai e nisi karrierën e tij si futbollist në vitin 1981 tek skuadra e Ajaksit. Ai u bë golashënuesi më i mirë në kampionatin holandez për 4 sezone, duke shënuar 118 gola në 112 ndeshje, dhe fitoi Këpucën e Artë në sezonin 1986-1987.
Në vitin 1987, Berluskoni e mori Van Bastenin tek Milani. Në sezonin 1988-1989, ai fitoi Topin e Artë si futbollisti më i mirë europian. Van Basten, u detyrua të tërhiqet herët nga futbolli, për shkak të dëmtimeve të shpeshta. Në moshën 28-vjeçare, ai vari këpucët në gozhdë.
Në moshën 7-vjeçare, Nuri nisi karrierën e tij tek Ajaksi. Ishte një nga talentet me më perspektivë të akademisë së të rinjve të Ajaksit. Në vitin 2012, Nuri mori çmimin e lojtarit më të mirë midis të rinjve. Në sezonin 2016-2017, ai u shpall si lojtari më i mirë në divizionin e dytë të kampionatit holandez. Më 21 shtator 2016, Nuri shënoi në ndeshjen e tij debutuese me ekipin e parë të Ajaksit, nga një goditje dënimi.
Ai duhej nga të gjithë në klub. Nuri u shemb përtokë gjatë një ndeshje miqësore ndaj Verder Bremenit në vitin 2017. Njëzetvjeçari, kishte pësuar dëmtime të rënda, pasi vuante nga problemet me zemrën. Ai u detyrua të mbyllë karrierën e tij në moshën 20-vjeçare, për shkak të dëmtimeve të parikuperueshme të trurit.
Xhorxh Best, ishte futbollisti irlandezo-verior që debutoi me skuadrën e parë të Mançester Junajtid në moshën 17-vjeçare. Ai shënoi 179 gola në 470 ndeshje gjatë 11 viteve, dhe ishte golashënuesi kryesor i skuadrës për 5 sezone radhazi. Ai fitoi Kupën Uefa në vitin 1968, dhe u shpall lojtari i vitit në Angli dhe Europë. Por stili i tij i jetesës, i shkaktoi probleme të ndryshme, mes tyre edhe alkoolizmin. Në vitin 1974, Best i tha fund karrierës në kulmin e nivelit të tij, kur ishte vetëm 27-vjeç, dhe vdiq në moshën 59-vjeçare për shkak të një ataku kardiak. 
Erik Kantona, ishte një futbollist francez që e nisi karrierën në vitin 1981, tek skuadra e Okserit. Ai debutoi me Mançester Junajtid më 1992. Ai ishte idhulli kryesor i tifozëve, për aftësitë si futbollist dhe aksionet e çmendura sulmuese. Kantona luajti në këto nivele edhe 5 vite të tjera.
Ai u largua nga Premier Liga me 4 kampionate, 2 kupa të fituara, dhe një çmim si lojtari i vitit në Angli. Mesfushori francez, u tërhoq në moshën 30-vjeçare, kur ishte në kulmin e nivelit të tij futbollistik.
Hidetoshi Nakata, cilësohet si futbollisti më i madh japonez i të gjitha kohërave. Ai e nisi karrierën si profesionist në vitin 1995, në skuadrën Bellmare Hiratsuka. Në vitin 1998, transferohet në Itali ku luajti fillimisht për Peruxhian, më pas për Romën, Parmën, Bolonjën dhe Fiorentinën. Në vitin 2001, ai fitoi kampionatin me Romën dhe në 2002-shin Kupën e Italisë me Parmën. Ai u shpall lojtari më i mirë i Azisë në vitet 1997 dhe 1998. Nakata njoftoi tërheqjen nga futbolli në moshën 29-vjeçare në vitin 2006, dhe që atëherë nisi karrierën si model.
TIRANA TODAY
