Një grup shqiptar që merrej me trafikun e lëndëve narkotike është goditur nga autoritetet italiane. Mediat shkruajnë se drejtuesi i kësaj organizate ishte një shqiptar i vënë në pranga në Barcelonë. Sipas burimeve, hetimi ndaj grupit nisi pas bisedave të përgjuara në platformën SkyECC.
Të gjithë bisedat kanë qenë në shqip dhe autoritetet italiane arritën të zbulojnë në këtë mënyrë aktivitetin e grupit që lidhet me të paktën 20 dërgesa të kokainës dhe hashashit nga Holanda vetëm për vitin 2020.
Sipas të njëjtave burime, vetëm kur droga nxirrej në rrugët e Bolonjës, fitimet e grupit arrinin deri në 5 milionë euro.
Bosi i bandës, i cili para se të shkonte në Spanjë jetonte në Itali, ka menaxhuar negociatat dhe dërgesat e lëndës narkotike bashkë me nipin. Ky i fundit, banues në Itali. Kur xhaxhai iku në Spanjë, nipi mori në dorë ‘frenat’ e grupit.
Edhe ky është vënë në pranga nga policia. Sipas autoriteteve në pranga kanë rënë edhe tre shqiptarë të tjerë dhe një tunizian.
Autoritetet italiane kanë arritur në përfundimin se shqiptarët i dërgonin në atdhe paratë për t’i investuar aty. Këto janë zbuluar nga analiza e mesazheve të përgjuara.
Por ajo që bën përshtypje është se grupi i shqiptarëve shfrytëzonte edhe ata që njihen si ‘mushka’ në botën e krimit. Bëhet fjalë për korrierë droge. Nën hetimin e policisë është edhe një 90 vjeçar i cili mendohet se transportonte drogë për grupin.
