Wolff “josh” Hamilton: Mercedes do ta ndihmojë të thyejë rekordin e Schumacher

Viti që lamë pas në Formula 1 ishte fantastik dhe me konkurencë mjaft të lartë. Ishte Ferrari që dominoi në fazën e parë, ndërsa në të dytën Mercedes bën kthesën e madhe dhe shpallet kampion. Shefi i makinës gjermane Toto Wolff bën një gjumë të qetë, pasi e di se ka në dispozicion dy pilotë kampionë si Lewis Hamilton dhe Valtteri Bottas, që së bashku formojnë një skuadër të fortë dhe fituese, siç dhe ndodhi vitin e kaluar. Kujtojmë që Hamilton akoma nuk ka nisur bisedimet për të rinovuar kontratën me “shigjetën e argjendtë” dhe nuk dihet çfarë do të ndodhë në vitin e ardhshëm, cili do të jetë vendimi i tij.

Duke bërë një krahasim me të njëjtën periudhë të një viti më parë, Wolff thotë: “Është një situatë më pak stresuese krahasuar me vjet. Por askush nuk e di saktësisht se çfarë do të ndodhë muajt që vijnë. Askush nuk e di se çfarë mendon në këto momente Lewis, do të rinovojë apo jo”, tha drejtori sportiv i Mercedes. Duke folur për pilotin britanik, që u shpall për të 4-n herë kampion bote, ai shtoi: “Paraqitja e tij ishte fantastike dhe nuk i mungon motivimi edhe pas 4 titujve kampionë. Mendoj se ai synon të arrijë rekordin e Schumacher, që ka 7 tituj kampionë dhe besoj se ka mundësi ta kalojë atë. Ne do të bëjmë maksimumin për t’ia dalë mbanë”.