Rrjedhja e informacioneve në Amerikë është bërë problem kryesor. Janë disa ish-punonjës të Departamentit të Shtetit dhe të Sigurisë Kombëtare që kanë nxjerrë informacione të rezervuara.
Kryeprokurori i Shteteve të Bashkuara, Jeff Sessions, thotë se arrestimi i Julian Assange është përparësi. Komentet nga kreu i Departamentit amerikan të Drejtësisë u bënë, ndërsa në media qarkullojnë njoftime se qeveria amerikane po përgatit akuza ndaj shtetasit australian.
“Ne po i rrisim përpjekjet kundër rrjedhjes së informacionit. Kjo ka marrë përmasa më të mëdha se çdo gjë tjetër. Kemi njerëz profesionistë të sektorit të sigurisë në SHBA, që tronditen prej volumit të madh të informacionit të nxjerrë, një pjesë e të cilit është serioz. Pra, është përparësi që ta luftojmë.”
Deklarata bëhet vetëm një muaj pasi Wikileaks botoi rreth 8 mijë dokumente, që pretendohet se hedhin dritë rreth mjeteve dhe programeve sekrete të CIA-s për të ndërhyrë në kompjutera, celularë dhe, madje, në televizorët inteligjentë.
Wikileaks kishte publikuar më parë 250 mijë kabllograme të Departamentit të Shtetit, si dhe qindra mijëra materiale të ushtrisë amerikane në Irak dhe Afganistan.
