Në sipërfaqet pyjore të djegura pranë Rrugës së Arbrit kanë nisur të shfaqen tabela me mbishkrimin “Pronë private”, ndonëse ende nuk dihet se kush janë “pronarët” dhe mbi ç’bazë ligjore janë vendosur ato tabela.
Dyshimet për një zjarrvënie të qëllimshme po bëhen gjithnjë e më të forta, sidomos pasi banorët e zonës, jashtë kamerave, kanë pohuar se prej kohësh flitet për instalimin e paneleve diellore në këto sipërfaqe. Kjo i shton edhe më shumë dyshimet se zjarret mund të jenë përdorur si mjet për të ndryshuar statusin e tokës, me synim përfitime private.
Rruga e Arbrit është një nga arteriet më të rëndësishme që lidh Dibrën me Tiranën, çka e bën çdo zhvillim në këtë zonë të dukshëm dhe të monitorueshëm jo vetëm nga banorët, por edhe nga autoritetet lokale, qendrore dhe strukturat e sigurisë. Megjithatë, nuk është marrë asnjë masë për të parandaluar zjarret apo për të ndaluar aktet e mundshme abuzive pas tyre.
Për më tepër, vendosja e tabelave “Pronë private” vetëm pak javë pas katastrofës mjedisore ngre dyshime serioze për përpjekje për të përfituar në mënyrë të paligjshme. Institucionet përgjegjëse duhet të hetojnë shkaqet reale të zjarreve dhe të verifikojnë ligjshmërinë e çdo pretendimi mbi pronësinë në këto zona. Mosreagimi institucional vetëm sa forcon perceptimin e një bashkëpunimi të heshtur ose të qëllimshëm me abuzuesit.
