Në protestën e fundit në Beograd kundër presidentit serb, Aleksandar Vuçiç, ka folur edhe ish-deputetja e Kuvendit të Kosovës, Rada Trajkoviç.
Trajkovqi ka adresuar kritika të rënda në drejtim të klasës politike serbe në pushtet, veçmas ndaj presidentit Vuçiç.
Siç raportojnë mediat serbe, Trajkoviç akuzoi përfaqësuesit politikë të serbëve në Kosovë dhe presidentin Vuçiç, duke thënë se shkaku i tyre serbët po shpërngulen nga Kosova.
“Ne nga Kosova nuk kërkojmë shumë, ne kërkojmë që serbët të mos kenë frikë nga serbët, dhe se ne kemi frikë nga Vuçiçnë pushtet”, tha Trajkoviç, përcjell Telegrafi.
Ajo po ashtu kërkoi nga Vuçiç që të ekstradojë nënkryetarin e Listës Serbe, Milan Radojiçiqi, si të dyshuar për vrasjen politikanit serb në Kosovë, Oliver Ivanoviç.
Ish-deputetja serbe në Kuvendin e Kosovës, ka shkuar edhe më larg në akuzat ndaj presidentit serb, duke thënë se Vuçiç është pajtuar me formimin e Ushtrisë së Kosovës.
“Presidenti serb është pajtuar me formimin e Ushtrisë së Kosovës me kushtin që ajo të jetë vetëm deri në Ibër. Ky kusht, siç po shihet, nuk do të respektohet, kurse po shihet dëmi i nënshkrimit të tij bllanko për heqje dorë nga ne poshtë lumit Ibër. Alekdandar Vuçiç e ka rrumbullakuar pavarësinë e Kosovës. Për këtë ai duhet të ndiqet penalisht”, tha Trajkoviç.
Thuhet se protesta në Serbi do të ketë edhe më 17 janar, në ditën kur në Beograd do të vijë presidenti rus Vladimir Putin.
