Presidenti serb Aleksandër Vuçiç tha se Bashkimi Evropian nuk do të pranojë anëtarësimin e Serbisë pa zgjidhur më parë çështjet e kufijve. Teksa ishte i ftuar në Happy TV, Vuçiç tha:
“Se si do ta zgjidhim, kjo është një tjetër çështje. A do ta zgjidhim apo jo? Njerëzit do të shprehin vullnetin e tyre me anë të referendumit”, tha Vuçiç.
Ai theksoi se ambasadori i ri francez tha atë që dihet tashmë, se “Serbia do të duhet të arrijë një marrëveshje ligjërisht të detyrueshme me Kosovën, e cila parashikon që çështja e kufijve të saj të zgjidhet”, shkruan B92.
Presidenti tha se personalisht “me siguri nuk do të largohet nga ajo që është zgjidhja më pak e keqe”.
“Sepse nuk ka asnjë zgjidhje të mirë. Brenda dy ose dy muaj e gjysmë unë do të vendos dhe nëse njerëzit nuk vendosin pro, atëherë kjo do të ishte një humbje e politikës sime”, shtoi Vuçiç.
“Të gjithë mendojnë, ‘Vuçiç, nëse e bën këtë, ne do të të heqim kokën dhe do falënderojmë Zotin që s’do të na duhet të përballemi me këtë vendim”, shpjegoi Vuçiç, duke iu referuar kritikëve, raporton Tirana Today.
Ai tha se në Llapnasellë në Kosovë, ku ishte fundjavën e kaluar, një grua serbe me të cilën foli, i tha atij, “Bir, thjesht mos nënshkruaj gjë”, dhe shtoi se edhe babai i tij i sugjeron të njëjtën gjë.
“Çfarë mendoni ju, a duhet dikush që të marrë vendime në këtë vend? E kemi kaluar këtë situatë ku nuk ka pasur nënshkrime dhe vendime. Dhe ju i dini të gjitha gjërat që kemi fituar dhe paqen ‘e blerë’ me marrëveshjen e Brukselit”, tha Vuçiç, duke shtuar se duhet të flasin për të ardhmen, se cfarë do të bëjnë, duke theksuar se “nuk përfitojnë asgjë nga konflikti me shqiptarët”.
“Ata nuk janë më të fortë se ne, por ne nuk duhet të jemi më të fortë; duhet të jemi më të pasur, më të suksesshëm, të nxitojmë dhe të arrijmë ata që janë përpara nesh, të kemi më shumë investime të huaja dhe vendase”, tha Vuçiç. TIRANA TODAY
