Rreth 1 muaj më parë 14-vjeçari Martin Cani u vra me thikë nga një bashkëmoshatar i tij, ndërsa i plagosur mbeti Luis Meçja, shoku i viktimës. Prindërit e Martinit, Engjëll dhe Floriana Cani, përmes një letre të hapur, që ia drejtojnë edhe Ambasadës së SHBA, ngrenë shqetësimet se po tentohet të shpëtohen autorët, ndërsa kërkohet zbardhja e ngjarjes plotësisht. Autori i dyshuar i ngjarjes është lënë në masën e sigurisë arrest me burg edhe nga Gjykata e Apelit.
Arben Hajdarmataj, ish-drejtues policie në një studio televizive tha se prindërit e Martin Canit kërkojnë një reagim moral nga institucionet, një dorëheqje nga drejtuesit e institucioneve.
“Minimumi një drejtor shkolle duhej të dorëhiqej, ose të japë dorëheqjen. Dhe pjesa e dytë e familjes së 14-vjeçarit ka të bëjë me hetimin”, tha Hajdarmataj.
Sipas tij, ne sot nuk kemi fakte publike nëse djali i plagosur ka një, dy apo 3 plagë me thikë.
“Avokatët e familjeve, qoftë të viktimës ashtu edhe të të plagosurit, kanë thënë se nuk kanë akte ekspertize, nëse gënjejnë është çështjes e tyre”, tha Hajdarmataj. Sipas tij, nëse familja ka të gjitha provat, atëherë përse duhet të dalë edhe të kërkojë një drejtësi në mënyrë publike.
