Drejtori i Policisë së Durrësit, Skender Hitaj në një deklaratë për mediat, duke marrë shkas nga vrasja e 32-vjeçares Luljeta Preza në Urën e Dajlanit, pohoi se do t’i jepet vëmendje e veçantë fenomenit të prostitucionit.
Ai tha se është bërë në kohë rekord identifikimi dhe arrestimi i dy autorëve të ngjarjes, Aldo Brahimit dhe Ylli Grabovari. Po ashtu janë proceduar penalisht edhe 3 shtetase, të cilat kanë qenë të pranishme në momentin e krimit, por nuk e kanë kallëzuar atë deri në momentin që janë shoqëruar në polici. Hitaj shton, se pas kësaj ngjarje të rëndë, vëmendja ndaj këtij fenomeni do të jetë e shtuar.
“Nga veprimet e thelluara hetimore, nën drejtimin e Prokurorisë Durrës, u bë dokumentimi i plotë i ngjarjes. U përcaktua qartë mekanizmi dhe roli i personave të përfshirë në të. U bë e mundur identifikimi dhe kapja e autorëve në kohë rekord. Ka nisur procedimi në gjendje të lirë edhe për tre shtetase të tjera, njëra prej tyre e mitur. Këta shtetase deri në momentin e shoqërimit në polici, nuk e kishin kallëzuar krimin. Shprehim vendosmërinë se nisur nga kjo ngjarje e rëndë do t’i kushtohet një vëmendje e veçantë këtij fenomeni”, -tha ai.
