Të gjitha zarfet me fletë votimi që nuk do të shpërndahen tek votuesit deri të enjten, do të rikthehen në Komisionin Qendror të Zgjedhjeve. Aktualisht, rreth 20 mijë pako nuk janë ende në duart e votuesve emigrantë, nga 245 mijë të regjistruar gjithsej.
Përjashtim nga afati i shpërndarjes do të ketë vetëm Greqia, ku për shkak të vështirësive logjistike dhe afërsisë gjeografike, zarfet mund të dorëzohen deri të premten në qytetet e mëdha si Athina e Selaniku, dhe deri të shtunën në drekë në zona si Janina apo Larisa. Fletët e votimit nga Greqia do të transportohen përmes rrugës tokësore për të hyrë në Shqipëri deri në mbylljen e procesit të votimit, të dielën në orën 19:00.
Këtë të mërkurë, në KQZ mbërritën 13,600 zarfe, duke e çuar në 157 mijë numrin e përgjithshëm të votave të ardhura nga diaspora. Ndërkohë, qytetarët mund të dorëzojnë votën e tyre edhe direkt në pikat postare të DHL, pa pritur zarfin në shtëpi.
Rreth 6 mijë zarfe kanë ardhur nga Greqia, por pjesëmarrja mbetet e ulët krahasuar me shtetet e tjera. Kryeministri Edi Rama deklaroi se pjesëmarrja është inkurajuese, por ende e pamjaftueshme për herën e parë. Ai tha se shqiptarët e Italisë janë më aktivët me 74% pjesëmarrje, ndërsa nga Greqia janë vetëm 39%. Gjermania ka pjesëmarrje 72%, por ka ende 7 mijë zarfe të pa dorëzuara.
Në total, 68 mijë qytetarë të diasporës e kanë marrë fletën e votimit, por nuk e kanë kthyer ende. Nga Greqia mbeten për t’u dorëzuar edhe 38 mijë vota – 10 mijë prej të cilave nuk janë marrë nga qytetarët, ndërsa 28 mijë janë marrë, por nuk janë kthyer.
Nga ana tjetër, opozita kërkon hetim të thelluar për procesin e votimit në Itali dhe Greqi, duke ngritur akuza për manipulime dhe parregullsi. PD ka dorëzuar në KQZ një raport të detajuar, ndërsa Jozefina Topalli tha:
“Ajo që po ndodh në Greqi është një kapitull i një krimi zgjedhor, manipulimi politik i votave që po ndodh atje. Shkuarja për të tërhequr pa identifikim për të marrë zarfin, apo për të dorëzuar zarfet, faktikisht e bën të pavlefshme votën që është marrë në mënyrë jashtëligjore.”
Edhe Partia e Lirisë reagoi përmes zëdhënëses Arla Merja:
“Qeveria ka mashtruar sërish. Premtuan votë për diasporën, por në prapaskenë kanë ndërtuar barriera, pengesa dhe një rrjet manipulimi që t’i heshtin ata që nuk i kontrollojnë dot. Sepse ata e dinë: diaspora nuk shitet, nuk frikësohet dhe nuk komandohet.”
Fluturimi i fundit me vota nga diaspora do të mbërrijë në Shqipëri të dielën në orën 17:00, ndërsa çdo votë që futet në doganë deri në orën 19:00 do të pranohet për numërim.
