Lidhur me zarfet e ardhura nga Greqia, po kryhet një proces i cili është kontestuar nga opozita dhe komisionerët e saj nuk pranojnë që t’i numërojnë këto vota.
Vendimi i Celibashit zhbllokoi procesin e numërimit të votave të diasporës në Parkun Olimpik dhe anëtarët e grupeve të numërimit po ndanin më vete në një kuti të re, votat e emigrantëve që jetojnë në Greqi. Por pas këtij vendimi, procesi rrezikon të bllokohet sërish.
Vendimi i Celibashit u ankua menjëherë nga Partia Socialiste, e cila kërkoi që vendimi të shfuqizohej si “absolutisht i pavlefshëm, i nxjerrë në kundërshtim me ligjin”.
Gjatë shpalljes së vendimit, KAS njoftoi se kishte pranuar kërkesës e PS-së dhe kishte konstatuar “pavlefshmërisë absolute të vendimit të komisionerit”.
Gjatë seancës së shqyrtimit, avokati i koalicionit “Aleanca për Shqipërinë Madhështore”, Marash Logu pretendoi se vendimi i Celibashit nuk zgjidhte ankesat që ky subjekt kishte për mënyrën e administrimit të votës së ardhur nga Greqia, por i jepte mundësinë procesit të numërimit që të vijonte dhe votat e kontestuara të trajtoheshin në një moment të dytë.
Ai pretendoi se opozita kishte prova se procesi i dorëzimit të zarfeve ishte bërë në kundërshtim me parashikimet kontraktuale me konmpaninë DHL dhe se zgjedhësit nga Greqia nuk kishin mundur të identifikoheshin sipas ligjit.
“Ka dy fakte qe ne i dimë: është kryer një në shkelje flagrante e kontratës që operatori i shërbimit postar DHL kishte lidhur me KQZ-në, nuk e ka kryer vetë procedurën e shpërndares dhe marrjes në dorëzim të zarfeve zgjedhore që vijnë nga Greqia por e ka bërë me nënkontraktim, ndërkohë që në kontratë thuhet qartë se nuk lejohet nënkontraktimi. I gjithë ky proces ka filluar me një shkelje flagrante të kontartës nga operatori i shërbimit postar.
Elementi i dytë nga data 17 prill deri në 4 maj, ne nga Greqia kemi pasur vetëm 17 mijë zarfe, në datë 4 maj keni një deklaratë të kryeministrit në Gjirokastër që thotë se procesi i shpërndarjes së fletëve të votimit në Greqi u bë mish-mash.
Po atë ditë drejtuesi politik i PS-së janë nisur drejt Greqisë, nga qendra të caktuara të DHL-së në Greqi, për të angazhuar marrjen në mënyrë të paautorizuar të zarfeve që kishin shkuar për zgjedhësit shqiptarë në Greqi, për ti plotësuar dhe dërguar në Shqipëri.
Nga data 5 maj deri në 11 maj, për 6 ditë ne kemi parë 36 mijë zarfe që kanë ardhur nga Greqia. Nga një mijë zarfe në ditë, shkuam në 6 mijë zarfe. Në vlerësimin tonë, kjo anomali, nuk është asgjë tjetër përveçse manipulim i zgjedhësve shqiptarë në Greqi” tha Logu.
