Mbrëmë, në orët e vona, dy peshkatarë humbën kontaktet me familjen. Lorenc Doko, 32 vjeç, dhe Elson Kerri, 37 vjeç, kishin dalë për peshkim në grykëderdhjen e Vjosës. Dy të rinjtë hidhnin rrjetat e peshkimit gjatë natës dhe dyshohet se kanë rënë në lumë ndërsa kryenin këtë proces. Lorenci dhe Elsoni përdornin një varkë të vogël për të peshkuar në atë zonë.
Peshkatarët e tjerë i kanë parë mbrëmë dy të rinjtë, kur po hidhnin rrjetat dhe kanë njoftuar menjëherë policinë, ndërsa dy të rinjtë nuk janë parë më në zonën e tyre të peshkimit. Policia ka filluar kërkimet menjëherë, sapo ka marrë njoftimin që prej natës së mbrëmshme. Polumbarët vijojnë kërkimet intensive për gjetjen e trupave të dy peshkatarëve, por deri tani nuk është gjetur gjë.
Familjarët bëjnë apel për mobilizimin e sa më shumë forcave, në mënyrë që trupat e të afërmve të tyre të gjenden sa më shpejt.
