Në repartin e pediatrisë të spitalit të Korçës është vërejtur një rritje e ndjeshme e fluksit të vizitave, që arrijnë deri në 60 raste në ditë.
Një pjesë e fëmijëve kërkojnë shtrimin në spital për shkak të komplikacioneve të shkaktuara nga virozat, të cilat kanë prekur të gjitha grupmoshat pediatrike, nga foshnjat një muajshe deri tek fëmijët 14-vjeçarë.
Shefi i pediatrisë, Robert Rado, tha se një pjesë e madhe e rasteve largohen pas vizitës, por ka edhe fëmijë që kanë nevojë për trajtim më të specializuar për shkak të gjendjes së rënduar. Ai shtoi se shumë prindër zgjedhin të çojnë fëmijët direkt në spital, pa u konsultuar më parë me mjekun e familjes, gjë që ka shkaktuar mbingarkesë në shërbimin e urgjencës.
Krahas pediatrisë, fluks të shtuar po përjetojnë edhe shërbime të tjera, si urgjenca për të rritur dhe sanatoriumi, ku është raportuar një dyfishim i numrit të shtrimeve në ditët e fundit të janarit. Stafi mjekësor po vazhdon të ofrojë shërbimin e nevojshëm, ndërsa autoritetet po shqyrtojnë situatën për të përmirësuar menaxhimin e rasteve.
