Primaret e organizuara nga Partia Demokratike kanë shkaktuar përplasje të forta në qarkun e Fierit, ku drejtuesi politik i këtij qarku, Gazment Bardhi, dhe deputeti i zonës, Luan Baçi, kanë debatuar ashpër lidhur me të drejtën e votës për anëtarët e rinj në këto primare.
Bardhi ka kundërshtuar që anëtarët e regjistruar pas vitit 2021 të kenë të drejtën për të votuar në këto zgjedhje të brendshme të partisë. Kjo ka shkaktuar një përplasje të ashpër me deputetin Baçi, i cili ka kundërshtuar këtë qëndrim. Dyshja është përfshirë në një debat me tone të larta në selinë e PD-së në Fier, ndërsa Bardhi ka akuzuar komisionin e votimit si persona të emëruar nga Luan Baçi.
Në degën e PD Fier janë të regjistruar rreth 7 mijë anëtarë, por deri në orët e drekës pjesëmarrja në procesin e primareve ka qenë shumë e ulët në të gjithë qarkun, duke hedhur dyshime për suksesin e këtij procesi zgjedhor të brendshëm.
