Këtë të enjte po i jepet lamtumira e fundit kapitenit të skuadrës së Fiorentinës Davide Astori, i cili u gjet i vdekur në dhomën e tij të hotelit të dielën, si pasojë e një ataku kardiak.
Yje të futbollit italian e ndërkombëtarë ndodhen në Firence, në ceremonine e homazheve që po mbahen në nder të kapitenit.
31-vjeçari, ndërroi jetë disa orë përpara se skuadra e tij të zbriste në fushë për të zhvilluar ndeshjen me Udinesen, e vlefshme për Serie A.
Teksa shokët e tij të skuadrës u fotografuan duke mbërritur në kishën Santa Croce, në Firence, për shërbimin funeral, me mijëra fansa pushtuan rrugët, disa prej të cilëve kishin shkuar aty disa orë përpara se të niste varrimi.
Ata duartrokitën fort ndërkohë që arkivoli i Astori kaloi përpara stadiumit Astemio Franchi. Të pranishmit thërrisnin emrin e tij dhe “grande capitano”, ndërsa në duar mbanin banera ku mund të lexohej “Per sempre nostro capitano” (Përgjithmonë kapiteni ynë).
Mes emrave të mëdhenj të futbollit ishin Gianluigi Buffon, Filippo Inzaghi, e Luciano Spalleti.
Fiorentina dhe Cagliari, klubet e Astorit mes 2008-s dhe 2016-s, njoftuan të martën se kanë tërhequr fanellën me numrin 13, në nder të ish-lojtarit të tyre.
Astori, i cili luajti për Italinë 14 herë, la pas partneren e tij Francesca Fioretti dhe vajzën e tyre 2-vjeçare. TIRANA TODAY
