Sulmuesi i kombëtares Azdren Llullaku është duke kaluar një moment fantastik në Rumani me ekipin e Astanas. Në përballjen me Cluj në kuadër të Kupës së Rumanisë, Llullaku ka gjetur dy herë rrugën e rrjetës dhe ekipi i tij ka fituar me përmbysje.
Sfida ka nisur mirë për këta të fundit, të cilët që në minutën e dytë të takimit kalojnë në avantazh, ndërsa në harkun e 5 minutave shënojnë dhe dy golat të tjerë, përkatësisht në minutën e 5` dhe të 8`.
Rezultati 3-0 në pak minuta nuk i mposht aspak psikologjikisht lojtarët e Astras, të cilët në minutën e 14` fitojnë një penallti. Kjo i besohet futbollistit të kombëtares shqiptare, Azdren Llullakut, që ekzekuton saktë dhe ngushton shifrat.
Në minutën e 24` vendasit shënojnë një autogol, ndërsa në pjesën e dytë të lojës Llullaku do të vendoste barazpeshën në fushën e lojës. Ishte minuta e 75` e takimit kur sulmuesi shqiptar shënon golin e barazimit për Astran, që e mbyll kohën e rregullt me rezultatin 3-3.
Ndeshja shkon në shtesë, për të përcaktuar skuadrën që vazhdon më tej. Të mbetur dhe me një lojtar më pak në fushën e lojës, futbollistët e Cluj e shohin veten në disavantazh në minutën e 9` të pjesës së parë të shtesës, pasi Astra përfiton nga një tjetër autogol i futbollistëve të Cluj, me takimin që përfundon me rezultatin 3-4. Kështu skuadra e Llullakut avancon më tej në Kupën e Rumanisë.
